Gitadlas sa iwag sa sakyanan ang nagliko-
Likong dalan subay
Sa baybayon sa Boljoon. Buot niining tugkaron
Ang kangitngit. Giablihan nako ang bintana
Aron sa ingon, sayon nga makasulod ang hangin
Nga sama sa imong kamot, gaan
Kaayong mihapyod sa akong aping. Gigakos ako
Sa kabugnaw ug akong nahagkan ang kaparat
Sa dagat.
Sa unahan, mibukhad
Sa akong panan-aw ang lapad nga hunasan
Nga daw gisabwagan sa nagkatag nga kahayag.
Kaingon ko ba’g minu
Apan gikan diay kadto sa gidagkotang langkay
Sa mga manuloay. Ug wa ko mamatngoni, mihinay
Diay ang akong dagan.
Apan sa gihapon, padayon nakong gitadlas
Ang ngitngit nga dalan. Gisirhan nako pagbalik
Ang bintana. Ug sa dayong pag arangkada, gilingi
Sa maka usa pa ang nagkatag nga kahayag
Sa lapad nga hunasan nga karon, diha sa gamayng samin
Kilid sa sakyanan, tapad sa naandan nimong lingkoranan,
Nahisamag usa ka tipak sa kagabhion
Nga namungingi sa mga bitoon.
Jeremiah Bondoc is a Telecom Engineer by profession. He traces his liaison with literature many summers ago when he chanced upon an article on the Dumaguete National Writers Workshop in which he was awarded a fellowship a few years later in 1997. Some of his works in English and in Cebuano have been published in various publications and anthologies.
Download
This work by Jeremiah Bondoc is part of the Bisaya poetry compilation Skina Balak, which you can download as an e-book below:
Download the file format for your device below:
EPUB For Google Books in Android, iBooks in iPhones and iPad as well as other e-readers and e-reading apps. Download here.
MOBI for the Kindle e-reader or Kindle app. Download here.
